🔥Agni अग्नी🔥

अखिल भारतीय कोंकणी परिशदेचें सव्विसावें साहित्य संमेलन शेनवार 22 आनी आयतार 23 नोव्हेंबर अश्या दोन दिसांनी केरळ राज्यांतल्या एर्नाकुलम ह्या शारांत घडून येवपाचें आसा. ह्या वाठारांत क्रियाशील आशिल्ल्या कोंकणी संस्थांनी जोड पालवान ह्या संमेलनाचें येजमानपण स्विकारलां. हें संमेलन केरळ राज्यांतल्या चालंत कोंकणी चळवळीक नवसंजिवनी दिवपी थारतलें हातूंत इल्लोय दुबाव ना. परिशदेचे वावुरपी समितीन तेच मोखीन पुराय संमेलनाच्या कार्यावळीची आंखणी केल्या. एर्नाकुलम शारांत राबितो करून आशिल्ल्या कोंकणी लोकांचो आंकडो खूब व्हड आसा. ह्या शारांत ल्हान व्हड आटापाच्यो कोंकणी कार्यावळी सातत्यान घडून येतात. अशें आसलें तरी साहित्य संमेलना सारखी राश्ट्रीय स्थराची कार्यावळ केरळ राज्यांत एका दसका उपरांत घडून येता. परिशदेचें सव्विसावें अधिवेशन 1 ते 3 फेब्रुवारी 2008 ह्या काळांत एर्नाकुलम शारांत जाल्यार 13 ते 15 फेब्रुवारी 2015 ह्या काळांत बाविसावें संमेलन कोझीकोड शारांत घडून आयिल्लें. आतां धा वर्सां उपरांत परतून एकदां केरळ राज्याक ह्या म्हाउत्सवाच्या आयोजनाचो मान फावो जाला. भारतभरचे कोंकणी लेखक आनी वावुरपी ह्...