समाज माध्यमांवेले विखाळ ॲटम बॉम्ब!
समाज माध्यमांवेले विखाळ ॲटम बॉम्ब!
समाज माध्यमां ही आयचे पिळगेक मेळिल्ली अप्रूप आनी मोलादीक देण! खिणा खिणाक व्हडा गतीन प्रगत जावपी विज्ञान, तंत्रज्ञान आनी ते वरवीं उपलब्ध जाल्लीं विंगड समाज माध्यमां हांकां लागून आयचो समाज फाटल्या पिळग्यांचे तुलनेंत उणेच धा- बारा वर्सां मुखावेलें जिवीत जगता. ताका संवसारभरचो इतिहास आनी चालंत घडणुकांची माहिती खिणा भितर मेळटा. ताच्या गिन्यानांत मोलाची भर पडटा. पूण दुर्दैवान, हींच समाज माध्यमां हालींसरा फटींगपणां, दुस्वास, मत्सर, ढोंगीपणां, अंधश्रद्धा आदी गजालींक पोसवण दिवपी व्यासपिठां जाल्यांत. समाज माध्यमांची विश्वासार्हता उणी जावंक लागल्या.
पहलगाम हांगा जाल्लो आतंकी हल्लो आनी उपरांत भारतान केल्ली खर कारवाय हाका लागून भारत आनी पाकिस्तान ह्या दोन देशां मदीं तणावाचें वातावरण तयार जाल्लें. भारतान पाकिस्तानांतल्या कांय सुवातीनी सैनिकी हल्ले करून आंतकवादाक जाप दिवपाक आमचो देश सक्षम आसा म्हणपाची शिटकावणी दिली. भारतान फारपेट, मिसायलां आनी ड्रोना वरवीं केल्ल्या हल्ल्यांक लागून देशांत कांय दिसां खातीर भिरांतीचें वातावरण तयार जाल्लें. दोनय देशांनी समजिकाय दाखोवन युद्ध बंदी मानून घेतली. कांय जाणांक शासनाचो हो निर्णय मानवलो ना. युद्ध हो खंयच्याच तणावाचेर वा प्रस्नाचेर परिणामकारी उपाय न्हय हें महाभारता सावन आयज मेरेन आमी भारतीय अणभवत आयल्यात. युद्ध हो अधिकार मेळोवपा खातीर केल्लो निमणो यत्न हें महाभारतांत श्रीकृष्णान कृतीन दाखोवन दिलां.
युद्धांत आसता तो फकत संहार. देशाचे शिमेर आपलें सर्वस्व पणाक लावन जे झुजतात तांकांच खबर आसता युद्धाची दाहकता. युद्धा उपरांतच्या विनाशाची चिंता आसता ती फकत देशाचे शिमेर मरणाक आव्हान दीत दुस्माना आड झुजतल्या सैनिकांच्या परिवार जनांक. युद्धाच्या काळांत नागरिकांनी संयमान, एकचारान, जापसालदारकेन वागून सैनीकांचें आनी शासनाचें मनोबळ वाडोवपाची अपेक्षा आसता.
भारत पाकिस्तान मदलें शस्त्रांचें युद्ध सोपलें तरी समाज माध्यमावेलें उतरांचें युद्ध अजून सोपपाचीं चिन्नां दिसनात. हें भारत आड पाकिस्तान युद्धा परसय चड भिरांकूळ युद्ध अशें म्हणल्यार अतिताय जावची ना. लोकांक फटीच्या आनी दुस्वासाच्या पोस्टांनी खुबळावन घालप, भ्रमीत करप आनी आपणे मेरेर बसून ताचो आनंद घेवप इतलेंच ह्या समाज माध्यम विखाळविरांचें कर्तूब. भोवतेक खबरां चॅनेलांनी आनी समाज माध्यमाचेर कांय तथाकथीत देशप्रेमींनी ह्या काळांत भारताच्या राखणे दळाक मेळूंक नात त्यो लेगीत गोपनीय खबरो मेळयल्यो. खंयच्या थळांचेर भारतान हल्ले केले ते युद्धांत सामील सैनिकांक आनी उंचेल्या सुरक्षा अधिकाऱ्यांक एक वेळ खबर नासत पूण ह्या लोकांनी आपूण प्रत्यक्ष गवाय आशिल्ले वरी घडणुको तयार करून त्यो समाज माध्यमांचेर मीठ मसालो लावन वितरीत केल्यो.
दुर्दैवान खरेपणाची तोडफोड करून कसलीच सत्यताय जाणून घेतले बगर समाज माध्यमांचेर व्यक्त जावपाचे प्रकार वाडीक लागल्यात. देशप्रेमाचो ठेको घेतिल्ले हे स्वयंघोशीत राष्ट्रवादी. युद्धा वेळार घरांत लिपून बसतले आनी समाज माध्यमांचेर मात्त शुरतायेचीं बातां मारतले. खंयच्याच समाजीक आंदोलनांनी वा चळवळीनी हांचें दर्शन केन्ना घडचें ना.
एकच फट परत परत सांगत राव, कांय दिसां उपरांत ती फट खरी कशी दिसपाक लागता असो एक सिद्धांत आसा. आपल्याक सोयिस्कर न्हय ती खरी खबर फटीचो लेप लावन वा फट खबर खऱ्याचो साज चडोवन समाज माध्यमां वरवीं वितरावप आनी आपलो अर्थीक, राजकीय सुवार्थ साधून घेवप हो कांय जाणांचो अजेंडा आसता. तांच्या असल्या करण्यांनी समाजाचें व्हड लुकसाण जाता म्हणपाचें भान तांकां उरना. फटीच्यो खबरो वितरावपी मनश्या परसय त्यो खबरो कुड्डेपणान फॉरवर्ड करपी लोक चड घातकी आसतात. दुर्दैवान अश्या लोकां मदीं उच्च शिक्षीत तशेंच समाजांत मान सन्मान आशिल्ले लोकय आसतात तेन्ना जातल्या लुकसाणेची खराय चड वाडटा. महात्मा गांधीजी सत्याक देव मानताले. सत्या कडेन प्रतारणा म्हणल्यार देवा कडेन प्रतारणा अशें ते म्हणटाले. सत्य ही फकत एक संकल्पना न्हय, तर आपल्या धर्मीक आनी नैतीक चौकटींतल्या अविभाज्य अस्तित्वाचो सार अशें तांकां दिसतालें.
दुस्वासाचो कारखानो चलोवपी हे तथाकथीत देशप्रेमी नैतिकतेच्यो सगल्यो फास्क्यो मोडटात आनी पिडीत वा कर्तुबी अस्तुऱ्यांक लेगीत सोडिनात म्हणपाच्यो देखीय आमी ह्या काळांत पळयल्यो. पहलगामच्या आतंकवादी हल्ल्यांत आपलें सौभाग्य वगडायिल्ली नौदल अधिकारी विनय नरवाल हांची घरकान्न हिमांशी हिणे दुस्वास विसरून शांतिकायेचें आवाहन केलें म्हूण तशेंच युद्धांत मोलाचें योगदान दिल्ल्या कर्नल सोफिया कुरेशी हांकां लेगीत समाज माध्यमांचेर ट्रोल करपाचे निंदनीय प्रकार घडले. युद्ध बंदीची घोशणा केल्ल्या विदेश सचीव विक्रम मिस्त्री आनी तांचे धुवेची लेगीत ह्या विखारी अपप्रचारांतल्यान सुटका जाली ना. वयल्यान आयिल्लो हुकूम मानून युद्ध बंदीची घोशणा करप हो मिस्त्रीचो गुन्यांव आशिल्लो? ताचे निश्पाप धुवेक मदीं हाडपाची कितें गरज आशिल्ली?
समाज माध्यमांचेर ट्रोल जातली व्यक्ती खंयच्या मनस्थितींतल्यान वता आनी तिका कितें मनस्ताप सोसचो पडटा हाचें भान ट्रोलरांनी दवरपाक जाय.
सवंसार दुश्ट मनश्यांक लागून न्हय तर मुखार घडटल्यो वायट करण्यो दोळे धांपून पळयता आनी ओग्गी बसता तांकां लागून भंयाकृत जाला अशें आल्बर्ट आयनस्टायन म्हणटाले. आयज समाज माध्यमाचेर तटस्थपणान, निर्भीडपणान सत्य मांडपी लोकांक ट्रोल जातना ओगी बसपी लोकय तितलेच जापसालदार आसात.
आमच्या देशाक पाकिस्ताना कडेन आशिल्ल्या अणूबॉम्बां परसय चड भंय आसा तो फटकिऱ्या पोस्टांतल्यान दुस्वास आनी विभाजनाचे अती विखारी अणुरेणू समाज माध्यमाचेर वितरावपी लोकांचो. समाज माध्यमांचेर अभिव्यक्त जातना संयम, विवेकबुद्ध, वास्तव आनी परिणाम ह्यो गजाली आमी मतींत दवरया. समाज माध्यमां जतनायेन आनी संवेदनशिलतायेन वापरया. आपात्काळांत तेंच खरें देशप्रेम!
Comments
Post a Comment