मानपत्र- सर्गेस्त रॉकी मिरांद

मानपत्र

सर्गेस्त रॉकी मिरांद

कोंकणी भाशेक आपलें भाशाशास्त्रीय अस्तित्व सिद्ध करपा खातीर व्हड संघर्श करचो पडला. प्रखर आव्हानांचो इतलो व्हड इतिहास घडये भोव थोड्या भासांच्या वांट्याक आयिल्लो आसतलो. आधुनीक कोंकणी चळवळीच्या इतिहासांत शणै गोंयबाब हांणी कोंकणी भाशेचो सर्वांगान अभ्यास केलो. भाशाशास्त्र संशोधनाच्या वावराची शणै गोंयबाबान बुनयाद घाली. हे बुनयादीचेर शास्त्रीय अभ्यासाच्यो वणटी चडोवपाचो मोलादीक वावर कोंकणी समाजान सातत्यान केलो आनी आयजय करीत आसा. ज्या लोकांनी हो वावर पुरायपणान प्रामाणीक, भावनीक आनी लागणूक भावनेन केलो तातूंत सर्गेस्त रॉकी मिरांद हांचें नांव आदरान घेवंक जाय.  

सर्गेस्त रॉकी मिरांद हे कोंकणी भाशेचे निस्सीम भक्त आनी सेवक आशिल्ले. कोंकणी भाशेच्या विंगड घटकांचो तांणी शास्त्रीय नदरेन अभ्यास केलो. साहित्य आनी संशोधनाच्या सोबीत अलंकारांनी तिका सजोवपाचो वावर तांणी आपल्या जिवीत काळांत पुराय श्रद्धेन केलो.

तांचो जल्म 19 सप्टेंबर, 1937 दिसा कर्नाटक राज्यांतल्या मंगळूर शारांत श्रीमती वॅरोनिका आनी श्री जॅकोब हांच्या घरांत जालो. श्रीमती पुष्पा देवकी बोबडे हिचे लागीं तांचें जिणेभरा खातीर नातें जुळ्ळें. ह्या नात्याच्या मोग वेलीर एलिजाबॅथ नांवांचें एक सोबीत फूल फुल्लें.

रॉकीबाबान मद्रास क्रिश्चन महाविद्यालयांतल्यान पदवीचें शिक्षण घेतलें.1960 वर्सा बनारस हिन्दू विद्यापिठांतल्यान तांणी कला शाखेंत हिंदी साहित्य हो विशय घेवन पदव्युत्तर पदवी मेळयली. 1971 वर्सा न्यूयॉर्कच्या कॉर्नेल विद्यापिठांतल्यान तांणी भाशासास्त्र विशयांत डॉक्टरेट मेळयली.

एस. बी. कॉलेज, कार्कल, कर्नाटक (1960-62), धेंपे कॉलेज, पणजी, गोंय (1962-64) आनी कॉर्नेल विद्यापीठ, न्यूयॉर्क, अमेरिका (1964-69) हांगा आधुनीक भाशा विभागांत ताणें हिंदी भाशेचें अध्यापन केलें. अमेरिकेंतल्या मिनियापोलीस राज्यांतल्या मिनेसोटा विद्यापिठाच्या भासविज्ञान विभागांत ताणें इतिहासीक आनी इंडो-युरोपियन भाशाशास्त्र विशय शिकयलो (1970-95). भाशा बदल, भाशीक पुनर्रचणूक आनी दक्षीण आशियाई भाशाविज्ञान (खास करून कोंकणी आनी हिंदी) ह्या विशयांचेर तांचे साबार प्रबंध आंतरराष्ट्रीय जर्नलांनी प्रकाशीत जाल्यात.

‘मार्कीस हूज हू’ ह्या प्रतिश्ठेचे वळेरेंत ‘नोंद घेवपा सारखे भाशाशास्त्री’ म्हूण तांचो आसपाव जालो ताचो समेस्त कोंकणी समाजाक उपाट अभिमान आसा. लिंग्विस्टीक सोसायटी ऑफ इंडिया आनी लिंग्विस्टीक सोसायटी ऑफ अमेरिका ह्या संस्थांचें वांगडीपद तांकां फावो जाल्लें.

तांच्या 'प्राचीन कोंकणी भारत' ह्या ग्रंथाचें प्रकाशन कांय वर्सां आदीं अस्मिताय प्रतिश्ठानचे वतीन पणजे घडून आयिल्लें.

कोंकणी भाशेच्या तांच्या संशोधन आनी साहित्यीक वावराची आदरान आनी अभिमानान दखल घेवन अखिल भारतीय कोंकणी परिशदेचो हो माधव मंजुनाथ शानभाग जिणेगौरव पुरस्कार नमळायेन तांकां भेटयतात.

फा. मोउजीञु द आताईद

अध्यक्ष